一盒好靚好靚，但係我寧願唔收到嘅奶黃月餅
-----
一個好後生嘅病人今日過黎。上次我見佢係幾個月前嘅事。佢企唔穩，開始語無倫次，我講嘅嘢佢聽唔明。Call老公黎，個陣我逼緊老公俾我地Call白車送佢老婆入急症。
第二日我地售後服務打電話睇下病人點，知道雖然入咗公家院，但係要緊急安排出私家自費照腦，心知不妙。
今早見佢Book左會過黎，心入面雀躍期待佢快啲出現。見番佢時，消瘦左，有啲憔悴，面色幾好。好想佢話比我知個腦冇嘢，或者只係生良性腫瘤。佢笑住話末期癌症擴散入腦。佢唔煙唔酒，生活正常。同老公兩口子甜甜蜜蜜咁生活。屋企人冇cancer history。
佢帶咗個要佢話比我知，先至發現得到嘅靚靚短啡色假髮。我叫佢比我摸下，真髮做架！原來用真髮做嘅假髮，同用假髮做嘅假髮嘅價錢一樣貴。梗係揀嗰真髮啦。佢話帶著唔焗，但係好痕，因為佢自己啲頭髮依家係生番出嚟，短短地，吉下吉下。
佢好樂觀，言語中帶點釋懷嘅感覺。佢話寧願好似上次咁喺我度病發，等佢知道自己有病，可以早啲醫。雖然我覺得當然唔夠早。
化療做左，而家無限期咁食鏢靶藥，食到隻藥有抗藥性為止。之後就轉新一代藥，轉到自己冇經濟能力負擔，或者冇再需要食為止。
大家傾到最尾，佢遞上呢盒月餅俾我。我同佢講以後唔好咁客氣，肥死我，我已經冇quota！心諗至少我能夠引到佢笑。
盒月餅好靚好靚！多謝你！
希望你快啲好番！
祝你以後仲有好多個中秋節同你老公人月兩團圓！
好老套，但life is short！
快啲去旅行，唔好淨係掛住儲錢買樓。食多包薯片，食多條朱古力，做啲自己開心嘅嘢。陪下身邊愛錫你嘅人。
我係時候諗下邊度領養隻狗狗啦！
Search